1 Corinthians 10

1Oma-zaje mi ye ma pa fye nya ɓo nko ɓei zhin ya dada n zhabui nyi. Shekwoyi ɓei tu ɓa fun n ʼnyi yakwo yi, har Wa shi ɓa bwa ɓa pi ola yakwo ya, n na yi kwo ge Ola Byei nyi. 2A zhin ɓa batisma vinya dna ola yakwo ye, ɓedo n ʼnyi ye yi ɓa ku ze Musa aviyi. 3Oɓa vinya ɓa gyi nya-gyi zafun nya. 4Oɓa vinya njesun ɓa sin nuwan zafun nya. Ntuge ɓa ɓei sin n Napma zafun nya nu nko ɓei gni lo ɓai nyi. Kristi nu ɓei zhin Apma yi. 5Dudu lonu n mwa begye n ɓa mi, to ɓa zhin ɓo Shekwoyi ye ce yim. Ntucenu a wuɓa laɓa n zhabui.

6To, aɓeye vinya kwa ɓa zhin pmagna nu n ya ba ge, yi to ye aɓo nukwoyi shi ɓa ɓei zhin nyin. 7To ya gba ashan shi azaho n ɓa mi ɓei zhin nyi m. (Shi Littafi ku da “Aza ɓei sase zhi ɓa gyi ɓai sin, ɓa kuka ntuge ɓa nya-nya,” ɓai ga nakwo ɓiyi zhin-zhin mwa-mwa.)

8Yi to zhin anagbayi m, shi azaho n ɓa mi ɓei zhin har aza dubu shibacei ata (23,000) ɓa fi n nyipyei gmanyi. 9To ya mwi Shekwoyi hakuri gye m, shi azaho n ɓa mi ɓei zhin nyi m, awa saɓaya laɓa cei har efi. 10To ya da gnunu-gnunu tu n, ʼnya Shekwoyi la ga yim. Ngye shi azaho n ɓa mi ɓei zhin, cenu ɓei zhin Shekwoyi wa tnu nwo malaika yi wa wu ɓa.

11Aɓoye ɓei zhin ɓa vinya ntu ɓesisi ɓo nu. A ka ɓa fi n Littafi ntuge ɓa ceyi ɓepa, ntuge yi fi nʼsa nu n nanyi ku ga zo.

12Ntuce nu zaho-zahoi nwo gye lo ge, wo migni lo woi zhin nubo ge, “Ai mita zhin lonun” ko la ze pmagna n ha ɓa. Ntuge kpekni hohin ɓa kaya dna n laifi ce. 13Jaraba daho-dahoi n kwo ɓa ɓe haba, to oko pya nu ɓe azaje aba ce. Ama Shekwoyi zhin gbenu-yi nu. Wo ta ye ge a zhin ho jaraba n ko ɓa duho kala wyim. Esa n ha lo jarab ho, Wo ɓa gaho kala ha gni agni dako, har Wa wu ho zokwo n ho ɓa gmiya nkwo mi. 14Ntucenu, oma nugundo, fye na ashan-gba dohodohoi pya ɓo.

Yi Ta Mi Nce Zhin M

15Mi daɓo n fyei ngye a wyega da nu. Fye mwi mi ɓeda n fyehin tukwo yi fya gye. 16N Dagayi tebur, esa yi tu nuwan byei anabarka, kwo to wu ge, yi gni anabarka bwa nu dna n Yesu amin? Esa yi sa bredi ya, ya gyi, kwo wu ge yi gni Yesu nayi apma bwa nu n najei. 17Kwo shi kwo nyi bredi bwasun gmanyi nu nʼyi sagaje, eyi vinya kwa n mwa begye, yi zhin nayi gmanyi nu dna Kristi ntuge yi gyi bredi gmanyi nu. 18Fye dna a Yahudiyi wye, aza ɓa gyi nya na lako zhin hadaya cei, ɓa ku ze gmanyi dna hadaya tnu-tnu yi mi.

19Miye ma da gena na? Fye gye ge mi da nu ge ashan zhin anya awyewyei nu, ko anya na gba kpe ɓa nyi ge ɓa na ʼpma hoi lo? Aʼa, ko fyefye. 20Oɓo nyi mi da ge enya na ku gba kpe nʼshan to a ga Shetan nu, toge Shekwoyi m. Mito cei pma lo kwa fya ze gmanyi n shetan yim. 21Fye ta mi fya sin dna n Dagayi bwe, fyalo fyei je shetam nya sin m. Fye ta mi fya gyi Dagayi tebur fya lo fyei je shetan nya gyi m.

22Yiye ya la Shekwoyi shewo ka nu? Yi duwolo n kala nu? 23“Yi ɓa mi ya zhin nyaho-nyahoi,” ama nyaho-nyahoi nu to bmiya lo m. “Yi ɓa mi ya zhin nyaho-nyahoi,” ama nyaho-nyahoi nu to n bmiya lo m. “Yi ɓa mi ya zhin nyaho-nyahoi,” ama nyaho-nyahoi nu to n bmazhin yi lom. 24Kwo to bmiya lo zaho zahoi, wa gna wohin ye wa zan wa gmada shin nwo gmanyi yi m. Pa ho zado ɓo nʼɓo yi nko bmiya lo n tu wo ɓo.

25Fye ɓa mi fya gyi nyaho-nyahoi n na ʼbu-da kun n gnikwo ntna ɓo nya yi. Ntuge n ha nyaɓo, kpekni oɓo na ɓa dnaho ʼgbe cei nyi, ko ɓa zun ho bugba kni. 26Ntuge ekni n nyaho-nyahoi ye nko dna ko, ko wun Dagayi nu.

27Ndei shetan da wa yi ho nyagyigyi, oho bugba la ge ho ɓa lo, to, gyi nyaho-nyahoi nwa ɓeho cei n tna ɓo nyai, ntu bugba kni-zun ɓo. 28Ama n zahoʼa gna ho ge, “Aku shan gba n nyagyi ye yi, to, to gyi nyagyi yi m,” ntu zayi ɓo nwa gnaho nyi, njesun ntu bugba knizun ɓo. 29Zayi, bugba kni-zun nu nmi daɓo, to ge oho nya m. Kpekni ha nya ge, “Ntu kni ɓeyi nu zado bugba knizun kwa kma mi ɓo zhin n mi cei pma?” 30Knihi nu ɓa zhin nyagyi miɓa sa Shekwoyi ami ma gyi ko na gmada yi, zaho wa ci ma ɓenya, shi ko nyi wo gye lo ge mi la bwa ba? 31Ntucenu, nyaho-nyahoi n ho ɓa zhin, ko hoi gyi nu, ko hoi sin nu, zhin ko ntuge ha ga Shekwoyi mwamwa. 32Fye to ze dalili bonyicenya n zaho-zahoi abam, ko a Yahudiyi Ko a Heleniyi, ko ekklesiya Shekwoyi nyam. 33Oɓo nu mi zhin, Mi-i yi mihin ma zhin ɓo ko da aza vinya n ɓeho-ɓehoi zhin, toge mi-i vi ɓo nu nʼmi bugba ye ce yim, ko oɓo ko gna bmiya lo ntu mi ʼɓom, ama oɓo ko gna bmiya lo ntu na za ɓo, ntuge kpekni ɓa pwo.